საქართველოს კალათბურთის ნაკრებმა „ევრობასკეტ 2025“-ის საკვალიფიკაციო ეტაპის მორიგი შეხვედრა გამართა. ქართველმა კალათბურთელებმა მსოფლიოს ვიცე-ჩემპიონ სერბეთს უმასპინძლეს. მატჩი სერბების გამარჯვებით, ანგარიშით 76:63 დასრულდა.

სერბეთთან შეხვედრაში 20-წლიანი სანაკრებო კარიერა დაასრულა გიორგი ცინცაძემ. კალათბურთელი ქართველ გულშემატკივარს ეროვნულ ნაკრებში გამართული 217-ე მატჩით დაემშვიდობა. ამ შედეგით ცინცაძე საქართველოს ნაკრების რეკორდსმენია.

საკალათბურთო მატჩს საქართველოს პრემიერ-მინისტრი ირაკლი კობახიძე, საქართველოს კულტურისა და სპორტის მინისტრის პირველი მოადგილე იოსებ ბაღათურია და მინისტრთა კაბინეტის სხვა წევრები ესწრებოდნენ.

საქართველოს ნაკრები „ევრობასკეტ 2025“-ის G ჯგუფშია სერბეთთან, ფინეთსა და დანიასთან ერთად. მომდევნო მატჩს ქართველი კალათბურთელები 21 ნოემბერს ფინეთში გამართავენ, 24 ნოემბერს კი მეტოქეს თბილისში უმასპინძლებენ.

ავტორი: ბადრი კობიაშვილი/Badri Kobiashvili
ფოტო: ხატია ჯიჯეიშვილი/Khatia Jijeishvili

27.02.2024