საერთაშორისო სათხილამურო ფედერაციის (FIS) ორგანიზებით ბაკურიანი სქი ქროსსა და სნოუბორდ ქროსში 2021 წლის მსოფლიო თასს უმასპინძლებს. 26-28 თებერვალს შეჯიბრი სქი ქროსში, ხოლო 3-5 მარტს სნოუბორდ ქროსში გაიმართება.

სპეციალურად შეჯიბრისთვის აშენდა 3 ახალი საბაგირო, დამონტაჟდა ხელოვნური გათოვლიანების სისტემა, შეძენილ იქნა სპეც-ტექნიკა და უსაფრთხოების ინვენტარი. ღონისძიების ფარგლებში საქართველო 200-მდე სპორტსმენს, Ski Cross​-ის დირექტორს - კლაუს ვალდნერს და ფედერაციის სხვა წარმომადგენლებს მასპინძლობს.

მსოფლიოს სხვა სამთო კურორტების მსგავსად, ბაკურიანი სეზონს დაკეტილი შეხვდა, თუმცა შეჯიბრი შეფერხების გარეშე, FIS-ის პროტოკოლის, წესების და რეგულაციების დაცვით ჩატარდება. კურორტები ჩვეულ რეჟიმს 8 მარტიდან, გახსნილი საბაგიროებით დაუბრუნდება.

მსოფლიო თასის მეშვეობით, საქართველოს შესაძლებლობა აქვს, პოზიციონირდეს მსოფლიოს იმ ქვეყნებს შორის, რომლებსაც მაღალი დონის სამთო სპორტული შეჯიბრებების უსაფრთხო ორგანიზება შეუძლიათ.