მთელ მსოფლიოში კორონავირუსის გავრცელების სწრაფი ტემპების და სხვადასხვა ქვეყანაში სიტუაციის კრიტიკული გაუარესების გამო, ძიუდოს საერთაშორისო ფედერაციამ (IJF) მიიღო გადაწყვეტილება მარტსა და აპრილში დაგეგმილი ყველა საერთაშორისო ტურნირის გაუქმების შესახებ.

IJF-ის ოფიციალური გადაწყვეტილების თანახმად, ასევე აღარ გაიმართება 27-29 მარტს დაგეგმილი, ოლიმპიური თამაშების საკვალიფიკაციო ტურნირი - თბილისის გრან პრი ძიუდოში, სადაც მონაწილეობა მსოფლიოს 90 ქვეყნის, 700-მდე სპორტსმენს უნდა მიეღო.

შექმნილი მდგომარეობიდან გამომდინარე, ძიუდოს საერთაშორისო ფედერაცია ითვალისწინებს როგორც სპორტსმენთა, ასევე ტურნირების ორგანიზატორთა უსაფრთხოებას და კორონავირუსის პრევენციისთვის მაქსიმალურ ზომებს მიმართავს.

მაისის თვიდან გასამართი ტურნირების და ასევე სპორტსმენთა ოლიმპიურ საკვალიფიკაციო ციკლში ჩართულობის სამართლიანი პრინციპების დაცვის შესახებ ინფორმაციას ძიუდოს საერთაშორისო ფედერაცია რამდენიმე დღეში გამოაქვეყნებს.

ძიუდოს საერთაშორისო ფედერაციის განცხადება (IJF) იხილეთ ბმულზე:

https://www.ijf.org/news/show/all-olympic-qualification-events-cancelled-until-end-of-april?fbclid=IwAR34Sugq6PXI8VA0dm-4F9BDh87b4Cm2Gu9prkAfz6Iy8aJOWyCn-klEhjE