განათლების, მეცნიერების, კულტურისა და სპორტის მინისტრი მიხეილ ბატიაშვილი, მოადგილე შალვა გოგოლაძესთან ერთად, მსოფლიო ჩემპიონატიდან წარმატებით დაბრუნებულ საქართველოს ახალგაზრდული ნაკრების წევრებს სამინისტროში შეხვდა და ისტორიული გამარჯვება მიულოცა.

მაროკოს ქალაქ მარაქეშში გამართულ მსოფლიოს ახალგაზრდულ ჩემპიონატზე, ახალგაზრდა ქართველმა ძიუდოისტებმა ინდივიდუალურ შეჯიბრში 3 ოქროს, 1 ვერცხლისა და 1 ბრინჯაოს მედალი მოიპოვეს და მედლების რაოდენობით გუნდურ ჩათვლაში იაპონიის შემდეგ მეორე ადგილი დაიკავეს. გუნდურ ტურნირში ჩვენი გუნდი ბრინჯაოს პრიზიორი გახდა.

აღსანიშნავია, რომ პირველად ისტორიაში, ახალგაზრდებს შორის მსოფლიო ჩემპიონის ტიტული ეთერ ლიპარტელიანმა (-57 კგ) მოიპოვა და პირველი ქართველი მსოფლიო ჩემპიონი ქალი ძიუდოისტი გახდა. მსოფლიო ჩემპონის ტიტულს ვლადიმერ ახალკაცი (-81 კგ) და ლაშა ბექაური (-90 კგ) დაეფლნენ, ილია სულამანიძე (-100 კგ) ვერცხლის, ტატო გრიგალაშვილი (-81 კგ) კი ბრინჯაოს პრიზიორები გახდნენ.

მინისტრთან შეხვედრას ახალგაზრდული ნაკრების წევრებთან და მწვრთნელებთან ერთად, ძიუდოს ფედერაციის პრეზიდენტი გიორგი ათაბეგაშვილი, ეროვნული ოლიმპიური კომიტეტის პირველი ვიცე-პრეზიდენტი ელგუჯა ბერიშვილი და ვიცე-პრეზიდენტი მამუკა ხაბარელი დაესწრნენ.

შეხვედრაზე ახალგაზრდებთან ერთად იმყოფებოდნენ ვეტერანი ძიუდოისტები - ალექსი დავითაშვილი და ვანო გიგილაშვილი, რომლებმაც ასევე მარაქეშში გამართულ ვეტერანთა მსოფლიო ჩემპიონატზე ოქროს მედლები მოიპოვეს.

ფოტო: ხატია ჯიჯეიშვილი