საქართველოს დელეგაციისთვის ევროპული თამაშების მე-4 დღეც წარმატებული გამოდგა. ჩვენმა ოლიმპიურმა გუნდმა 4 მედალი მოიპოვა. ევროპული თამაშების გამარჯვებული მსოფლიოს ჩემპიონი, ძიუდოისტი გურამ თუშიშვილი გახდა. თუშიშვილმა ამავდროულად ევროპის ჩემპიონატის ოქროს მედალი დაისაკუთრა, რადგან ძიუდოში ევროპული თამაშები და ევროპის ჩემპიონატი ერთ ტურნირშია გაერთიანებული.

+100 კგ წონით კატეგორიაში მოასპარეზე თუშიშვილმა ოთხივე შეხვედრა მაღალ დონეზე ჩაატარა და ყველა მეტოქე იპონით დაამარცხა. რუმინელი და პოლონელი ძიუდოისტების დამარცხების შემდეგ, გურამმა ჰოლანდიელ ჰენ გროლს სძლია. ფინალში მსოფლიოს ჩემპიონის მეტოქე რუსი ინალ ტასოევი იყო. თავდაპირველად, ტასოევი ვაზარით დაწინაურდა, თუმცა თუშიშვილის საპასუხო გდება სუფთა გამარჯვების მომტანი აღმოჩნდა - მინსკში მეექვსედ აჟღერდა საქართველოს ჰიმნი!

სამწუხაროდ, ფინალური შეხვედრა დათმო ვარლამ ლიპარტელიანმა (100 კგ). საქართველოს ნაკრების კაპიტანმა ფინალამდე ბელარუსელ და მონტენეგროელ მეტოქეებს, ასევე ფრანგ სირილ მარეს სძლია. გადამწყვეტ შეხვედრაში ლიპარტელიანი რუსეთის ნაკრების წევრს, არმან ადამიანს დაუპირისპირდა და იპონით დამარცხდა, რის შედეგადაც ევროპული თამაშებისა და ევროპის ჩემპიონატის ვერცხლის მედალს დაეუფლა. ძიუდოს ნაკრებმა ჯამში 2 ოქროს, 1 ვერცხლისა და 4 ბრინჯაოს მედალი მოიპოვა და ვაჟთა შორის გუნდურ ჩათვლაში პირველი ადგილი დაიკავა.

კიდევ ერთი ვერცხლის მედალი ბატუტზე მხტომელმა ლუბა გოლოვინამ მოიპოვა. ფინალში გადასასვლელად გოლოვინას საუკეთესო ექვსეულში შესვლა სჭირდებოდა. ლუბამ 98.200 ქულა დააგროვა და მე-8 შედეგი აჩვენა. თუმცა, მის წინ გასულ სპორტსმენთა შორის 2-2 ფრანგი და ბელარუსელი იყო. ფინალში ერთი ქვეყნიდან მაქსიმუმ ერთ სპორტსმენს შეეძლო ასპარეზობა. შესაბამისად ლუბა ექვსეულში მოხვდა და ფინალში გამოსვლის უფლება მოიპოვა. ფინალში გოლოვინამ ბრწყინვალედ იასპარეზა, 53.970 ქულა დააგროვა და მეორე შედეგი დააფიქსირა.

თამაშების მე-4 დღე ნინო სალუქვაძისა და ცოტნე მაჭავარიანის წყვილის ბრინჯაოს მედლით დაიწყო, ქართველმა მსროლელებმა პისტოლეტით 50 მ დისტანციიდან სროლაში ფინალში 87.7 ქულით მესამე ადგილი დაიკავეს. პირველ ადგილზე რუსეთის ნაკრები გავიდა, ხოლო მეორე ადგილი ლატვიელებს ერგოთ. სალუქვაძე და მაჭავარიანი ინდივიდუალურ შეჯიბრებებშიც იასპარეზებენ. ჩვენი ოლიმპიური გუნდი 6 ოქროს, 5 ვერცხლისა და 9 ბრინჯაოს მედლით საერთო გუნდურ ჩათვლაში მე-3 ადგილზეა და მხოლოდ რუსეთსა და ბელარუსს ჩამორჩება.

ფოტო: ხატია ჯიჯეიშვილი